而當香港人都唔記得，唔重視呢個籌碼，間接令大陸一方都唔記得左香港有個皇牌，對佢地發展、掘起係好重要。
這個籌碼唔係咩搵錢至上的獅子山精神，而係一樣叫海洋法或普通法嘅司法體制。
先由盤古講起，英美建立嘅環球商業體系得以行之有效又稱霸全球，全係因為海洋法能夠將全球經商邏輯、習慣統一，得以減省成本。最簡單係A地案例能援引到B地，令到各地地頭龍唔可以為所欲為。先不理背後美帝英帝出發點是否自利，英美資本主義體系的確帶領左十九、二十世紀人類社會前進，在世界各地建立左不少真正法治社會。
當好多人話香港年輕人全部廢青唔上進，人地上堂又舉手發問jot notes討論積極英文流利，那為何類似論調講左十幾廿年香港都仲未冧？廢青仲搵到幾餐晝仔，又未死晒仍然阻住地球轉？按鄭立言，咁係因為香港好幸運咁成為東亞地區唯一一個行海洋法嘅地方(http://chenglap-blog.logdown.com/posts/308237-legal-system-is-the-advantage-of-hong-kong-as-an-international-city)。海外投資者、基金佬落户香港，最大原因係香港背靠祖國有得比佢地搵錢之餘，同時又行緊普通法，唔會驚政府干預法院判決，對經商不利，安心投放資產而不用怕給無理充公。就係呢套海洋法體系還能在回歸差不多廿年後仲維持到，香港先會仲有好多水湧入黎，係香港住、買果棟樓、香港人身分先會仲值錢（炒貴晒d野另當別論)。
與此同時，大陸銀行、眾國企、民企等要來香港插旗上市，亦主要因為香港行緊普通法，外資放心在本地和中資合作融資。眾大陸公司要係香港吸外國水，就要根據國際商業慣例做事，合約要定清楚
，牙齒當金洗，無得你好似係大陸咁亂黎盤數又唔清唔楚，如果你唔清唔楚，唔受李小加管既證監會追到你瘦（566漢能好似仲未復牌）。
大陸公司亦可以係香港呢個自己地頭熟習海洋法體系嘅操作，起碼你係香港跟漏小小程序，只要補番鑊唔太過分大家自己人都會放你一馬。要走向世界呀嗎，一帶一路呀嗎，做亞投行打骰人呀嗎，你唔學點去公平處事做靚盤數，係其他國家係咁漏小小野都可以順風順水我跟你姓。
之但係咁，要維持一個完整既海洋法體系，首要條件係當地可以保障到居民各種基本自由。此話何解？海洋法係死，人係生，而人又係鬼咁自私，海洋法咁重視一視同仁，各地掌握龐大資源、權力嘅政府、權貴一定會視其為眼中釘，只要有機會就會想如此一視同仁嘅體系傾向自己多點。但就像鬥獸棋，有言論、出版、新聞自由、人生安全保障等等基本權利下，想一視同仁的廢青、受剝削社群才能無顧忌不平則鳴，各類利益團體才能捍衛自身利益，而權貴、政府日日俾人鬧，又要花成本維穩，搞唔掂又會有掉烏紗的威脅下，他們才會投鼠忌器，唔敢亂咁黎，這樣海洋法呢類高深體系先可以持續地維持，同時令當地大家都持續有飯開。
李波事件可怖就在於，這代表香港人一直擁有的言論、出版自由，人身安全保障全部可以𣊬間失去，你可以話係因為銅鑼灣書店出禁書先會咁，但其實呢類自由、保障係文明標準下每個都係死原則，即眾皆需要遵守的規矩，如果死原則變得可以通融，按執政者旨意決定，咁下一次可能香港人批評中國霧霾、維權問題，都可以被自願偷渡上深圳；再下次批評香港政府官商勾結，被自願上左羅湖以北協助調查又會講得通。
到這地步的話，香港唯一籌碼，那海洋法體系就唔洗再玩落去，換你是海外投資者要入大陸市場都會即刻走晒上上海、前海，寧買當頭起，自貿區、保稅區都一定好過你。這樣，香港就變得比東莞更不如，你棟樓嘅樓價肯肯定會跌到大陸二三線城市樓盤咁，跌成點都賣唔出。
而中國亦會失去唯一一個行海洋法而自己有主導權的地方。外資無左香港，會好有保留咁進駐上海、前海，咁無大害嘅，中國咁大國力咁強，但未滿師就直接將北京模式、過盛產能輸出中亞、東南亞，玩一帶一路。幾可肯定，到時每個接受投資國家一發現偷工減料、條數唔啱、貪污所引起嘅民怨，仇中情緒，成本會幾大我真係唔敢計。
我不相信理念、願景可以打動不願醒的人，能馬上影響人的往往只有利害得失。我亦不怪北人想不通宏觀的利害關係，要怪就怪大部分香港人遺忘香港的真正籌碼，同時不斷自我葬送這個唯一皇牌，你都忘記了，憑什麼人家就要記住，還幫你捍衛？
破壞海洋法體系城市對國家可能只係成本增不增加的問題，但對香港人而言事關生死存亡。理性討論利害，任你是左中右權貴五毛政治冷感討厭政治都好，只要你是沒什麼辦法移民，有都不知去哪好的那類香港人，都有機會給打動。希望各位今天起能從利害角度看待香港16年頭就出現的變化，嘗試用利害說服身邊人，現在真係殺到埋黎，香港九龍新界無得避。守唔住海洋法，香港真係死得。
